Er allt að verða vitlaust?

Nei ekki er það nú alveg en samt.

Í dag var undirbúningur undir kvikmyndagerð á fullu hér á Seyðisfirði.

Búið að setja upp öflugt mastur út í hólma með nokkrum hátölurum. Búið að breyta Herðubreið í allsherjar miðstöð, vinnustofu og mötuneyti fyrir hina fjölmörgu starfsmenn við verkefnið.  Snjóruðningur í fullum gangi og meira að segja hið glæsilega listaverk útlínur hefur verið klætt með blámáluðum krossvið.

Fjölmargir leikarar eru komnir á staðinn og á morgun byrjar sjálf kvikmyndatakan.  Í gær kvisaðist um bæinn að Brad Pitt væri væntanlegur í bæinn, enda um eitt stærsta auglýsingaverkefni sem um getur.  Þetta atriði var þó trúlega annað hvort óskhyggjahinna fjölmörgu aðdáenda hans hér, eða aprílgabb.

Kvikmyndatakan fer fram í miðbænum við Lónið, en einnig hafa kvikmyndagerðarmennirnir fengið aðstöðu víða annars staðar í bænum bæði úti og inni.

Afraksturinn ætti svo ekki að fara fram hjá okkur, því um er að ræða 3ja mínútna auglýsingu fyrir Sony.