Gangan yfir Fjarðarheiði.

Nokkur hópur fólks á Seyðisfirði hefur starfað í verkefni undanfarna mánuði, sem nefnist Göngum Göngum hópurinn.

Markmið hópsins er að standa fyrir göngum yfir Fjarðarheiði og með því vekja athygli á erfiðum og ótyggum samgöngum um Fjarðarheiði.

Með þessu vill hópurinn einnig stuðla að samheldni bæjarbúa og hollri hreyfingu þáttakenda.

Þriðja ganga hópsins var í gær og að þessu sinni var gengið alla leið frá Eyvindarárbrú að félagsheimilinu Herðubreið á Seyðisfirði. 

Þátt tóku milli tuttugu og þrjátíu manns og gengu flestir alla leið yfir heiðina.  Aðstæður voru alls ekki góðar og mestan hluta leiðarinnar var gengið í þoku.  Reynt var að gera ýmislegt til að auka öryggi þátttakenda. Þáttakendur voru flestir í skærlitum öryggisvestum sem forsvarsmenn göngunnar hafa útvegað.  Sett voru upp sérstök viðvörunarskilti beggja megin heiðarinnar.  Lögreglan var á svæðinu með eftirlit. Brýnt var fyrir göngufólki að ganga á köntunum og ganga ekki hlið við hlið.

Gangan sjálf gekk vel fyrir sig og engin slys á fólki.  Þó mátti í einhverjum tilvikum ekki muna miklu, því að akgreinar á heiðinni eru fremur þröngar og ökumenn ekki allir jafn varkárir.  

Tilfellið er nefnilega að vegurinn um Fjarðarheiði er alls ekki hættulaus gönguleið. 

Hann er einnig hættulegur fyrir akandi umferð, á veturna er það slæmt skyggni bæði vegna skafrennings og þoku, og svo eru akstursskilyrði oft slæm vegna hálku.

Á sumrin er oft þoka á þessum háa fjallvegi og brýnt að hafa gát á.

Loks bar að nefna það að samkvæmt mælingum Ólafs Guðmundssonar á vegum á Íslandi er þessi vegur einn sá hættulegasti á Íslandi.

Almennur skilningur á þörfinni fyrir úrbætur er alltaf að aukast,  og ég er þess full viss að jarðgangatenging til Seyðisfjarðar er að margra mati eitt brýnasta verkefnið í samgöngumálum landsins.

Starfið í þessum hópi hefur verið gefandi og maður hefur kynnst betur yndislegu fólki.  Fyrir það er ég þakklátur.